बृहन्महाराष्ट्रातील (महाराष्ट्राबाहेरील अन्य राज्यात)
मराठी माध्यमांच्या शाळांना व विद्यार्थांना शैक्षणिक साधनांचे वाटप
सन २०२५-२६
महाराष्ट्र राज्याने २०१० साली स्वीकारलेल्या सांस्कृतिक धोरणातील प्रकरण ४ “भाषा आणि साहित्य” याअंतर्गत – बृहन्महाराष्ट्र या विभागात बृहन्महाराष्ट्रातील मंडळांना अर्थसाहाय्य उपलब्ध करून देण्याच्या अनुषंगाने ‘बृहन्महाराष्ट्रातील संस्था / मंडळांना अर्थसाहाय्य’ ही योजना राज्य मराठी विकास संस्थेकडून राबविण्यात येते. या योजनेतंर्गत “महाराष्ट्राबाहेर अन्य राज्यांत मराठी भाषा, साहित्य आणि महाराष्ट्रीय संस्कृती या संदर्भात कार्य करणाऱ्या मान्यताप्राप्त संस्थांना / मंडळांना तसेच महाराष्ट्राबाहेर मराठी ग्रंथ प्रकाशनाचे दर्जेदार कार्य करणाऱ्या संस्थांना अर्थसाहाय्य देण्यात येते.”
याच योजनेचा एक भाग म्हणून शासन मान्यता प्राप्त ‘बृहन्महाराष्ट्रातील (महाराष्ट्राबाहेरील अन्य राज्यात) मराठी माध्यमांच्या शाळांना व विद्यार्थ्यांना शैक्षणिक साधनांचे वाटप’ ही योजना सन २०२५-२६ या आर्थिक वर्षापासून राज्य मराठी विकास संस्थेमार्फत राबविण्यात येत आहे. या योजनेतंर्गत बृहन्महाराष्ट्रातील (महाराष्ट्राबाहेरील अन्य राज्यात) शासन मान्यता प्राप्त मराठी शाळांना व विद्यार्थ्यांना पाठ्यपुस्तके, बाल मासिके, मराठी वृत्तपत्रे, शिक्षकांसाठी संदर्भसाधने यांचे विनामूल्य वाटप करण्यात येणार आहे.
या योजनेतंर्गत ठरविण्यात आलेल्या अटी-शर्तीनुसार महाराष्ट्राबाहेर मराठी भाषा, साहित्य व संस्कृती वृद्धिंगत होण्यासाठी कार्य करणाऱ्या मराठी माध्यमांच्या शाळांना अटी-शर्तीनुसार पात्र ठरणाऱ्या प्राथम्यक्रमांवरील १० शाळांना रु. १० लक्ष एकूण खर्चाच्या मर्यादेत प्रत्येकी रु. १ लक्ष इतक्या कमाल मर्यादेत शैक्षणिक साधनांचे वाटप करण्याचे योजिले आहे.
सन २०२५-२६ या आर्थिक वर्षात ‘बृहन्महराष्ट्रातील मराठी शाळांना व विद्यार्थ्यांना शौक्षणिक साधनांचे वाटप’ या योजनेतंर्गत मराठी माध्यमांच्या शाळांकडून दिनांक ०१/०१/ २०२६ ते २०/०१/ २०२६ या कालावधीत विहित नमुन्यात अर्ज मागविण्यात येत आहेत. या योजनेसंदर्भातील कार्यपद्धती व निकष, बृहन्महाराष्ट्रातील शाळांसाठी मार्गदर्शक सूचना, विहित नमुन्यातील अर्ज तसेच इतर तपशील राज्य मराठी संस्थेच्या https://rmvs.marathi.gov.in या व महाराष्ट्र शासनाच्या http://maharashtra.gov.in या अधिकृत संकेतस्थळांवर ‘नवीन संदेश’ या सदरात ‘बृहन्महाराष्ट्रातील (महाराष्ट्राबाहेरील अन्य राज्यात) मराठी शाळांना व विद्यार्थ्यांना शैक्षणिक साधनांचे वाटप’ सन २०२५-२६ या शीर्षकाखाली उपलब्ध करून देण्यात आले आहेत.
सदर योजनेचे अर्ज विहित नमुन्यात व विहित कालावधीत दि. ०१/०१/२०२६ ते २०/०१/२०२६ पर्यत अर्ज मागविण्यात येत आहे. अंतिम तारखेच्या कालमर्यादेनंतर प्राप्त झालेल्या अर्जाचा विचार केला जाणार नाही.
महाराष्ट्र राज्याबाहेरील बृहन्महाराष्ट्रात मराठी भाषा, साहित्य आणि महाराष्ट्रीय संस्कृती या संदर्भात कार्य करणाऱ्या मराठी माध्यमांच्या शाळांना सदर योजनेचा लाभ घेण्याचे आवाहन राज्य मराठी विकास संस्थेमार्फत करण्यात येत आहे.
खालील बटणावर क्लिक करून आवाहन, अटी व शर्तींबाबतची धारिका (File) डाऊनलोड (Download) करावी.
| आवाहन, अटी व शर्ती |