ज्येष्ठ साहित्यिक वि. वा. शिरवाडकर (कुसुमाग्रज) यांचा जन्मदिवस मराठी भाषा गौरव दिन म्हणून साजरा केला जातो. राज्य मराठी विकास संस्थेतर्फे यानिमित्ताने दोन महत्त्वपूर्ण पुरस्कार देण्यात येतात. या पुरस्काराचे हे चौथे वर्ष असून २०१५ मध्ये डॉ. अशोक केळकर भाषा अभ्यासक पुरस्कार डॉ. मॅक्सीन बर्नसन, फलटण यांना देण्यात आला. तर २०१६ मध्ये श्रीमती यास्मिन शेख, पुणे यांना, २०१७ मध्ये अविनाश बिनीवाले, पुणे यांना आणि यंदा हा पुरस्कार कल्याण काळे यांना प्रदान करण्यात आला. तर कविवर्य मंगेश पाडगावकर भाषा संवर्धक पुरस्कार २०१५ मध्ये बेबीताई गायकवाड, अहमदनगर यांना, २०१६ मध्ये श्याम जोशी, बदलापूर यांना, २०१७ मध्ये मुंबईतील मराठी विज्ञान परिषद या संस्थेला आणि यंदा हरिश्चंद्र बोरकर, भंडारा यांना प्रदान करण्यात आला.
मराठी भाषेसाठी काम करणाऱ्या व्यक्ती आणि संस्था यांच्या पाठीवर कौतुकाची थाप म्हणून आणि त्यांना पुढील कामासाठी प्रोत्साहन देण्यासाठी हे पुरस्कार देण्यात येतात. सुरुवातीला या पुरस्काराचे स्वरुप रोख रक्कम रु.१ लाख व मानपत्र असे होते. तर सन २०१७-१८ पासून पुरस्काराच्या रकमेत वाढ करून ती प्रत्येकी रु. २ लाख करण्यात आली आहे. या पुरस्कार सोहळ्यादरम्यान उपस्थितांसाठी विविध सांस्कृतिक कार्यक्रमांचे आयोजन करण्यात येते. यंदा नरिमन पॉइंट येथील यशवंतराव चव्हाण प्रतिष्ठान सभागृहात हा पुरस्कार सोहळा रंगला. तर या सोहळ्यासाठी सांस्कृतिकमंत्री, महापौर, खासदार, आमदार व इतरही नेतेमंडळी आणि मान्यवर उपस्थित असतात.